– nuannersunik periarfissalik
Narsarsuaq kujataata tamarmi naapittarfigaa illoqarfinnut amerlasuunut, misigisassanut oqaluttuarisaanermilu pingaaruteqartunut Narsarsuup eqqaata ilisarnaatigisaanut qanittumiilluni.
Aasaanerani Danmarkimiit Islandimiillu toqqaannartumik timmisoqartarneratigut Europamiit Amerikallu Avannaaniit takornariat nutaarluinnarnik misigisassaqarnissaminnut pinngortitami naggorissorssuarmi periarfissarpassuaqarput. Hotel Narsarsuaq akunnittarfiuvoq nutaaliaasoq ininut ataasiuttakkanut, marluuttakkanut, ilaqutariinnut ininullu angisuunut kusanasaakkanut agguataarsimasunut 93-inik initaqarpoq 220-nillu siniffeqarluni.
Akunnittarfiup neriniartarfiani qullermiittumi neriniartut kangerlummut qaqqanullu nuannerluinnartumik isikkiveqarput. Cafeteria imerniartarfillu akunnittarfimmi periarfissanut aamma ilaapput. Ataatsimeersuartarfimmi ataatsimiinnerni, pikkorissarnerni ataatsimeersuarnernilu peqataasunut 45-nut inissaqarpoq, taannalu aamma kangerlummut isikkivigissorsuuvoq ataatsimeersuarnernilu atortorissaarutit nutaaliaasut aamma pigineqarlutik.